張栢芝生女好夢，暫仍未能實現，據可靠消息指栢芝今胎佗的仍是男嬰，身為老爺的謝賢亦承認此事，並指謝家上下都十分高興！拉姑對新抱仔疼錫有加，常煲滋補靚湯給栢芝補身，栢芝亦遵照醫生吩咐，每日吃DHA及維他命丸，為誕精靈B作最佳準備。
栢芝嫁入謝家後便一索得男，誕下兒子謝振軒（Lucas），Lucas長得精靈可愛、乖巧聽話，深得全家疼錫，栢芝亦希望為Lucas添個妹妹，湊成「好」字。
謝賢證實係男B
去年，栢芝終於再度懷孕，腹中塊肉是仔是女備受關注，惟鋒芝面對傳媒追問都三緘其口，沒正面回應。上月，栢芝帶Lucas去睇馬戲，當時追問她佗的是仔還是女時，她只說：「已經照咗（超聲波），但未知仔定女。」而霆鋒亦從沒有正面回答。
話雖如此，據知栢芝夫婦已知道今胎懷的是男嬰，亦第一時間告知家人及身邊好友，生女之願要「繼續努力」，栢芝雖然未能如願追女，霆鋒以及家人都對她再佗男B感到十分高興，沒有半點失望。
身為栢芝老爺的謝賢昨被問到栢芝佗男B一事，亦大方承認：「係呀，佢哋一知道，已經話咗我知。（有冇失望呀？）梗係冇啦，生仔生女都好，都會繼續生㗎嘛，我一直咁錫栢芝就係咁解，佢真係好好，事事以家庭為先，好願意為屋企，真係好難得。（希唔希望今胎好似Lucas咁精靈？）梗希望，最好仲精靈過Lucas，一個比一個更好嘛！」至於孫仔的名字則由鋒芝去改。
拉姑煲湯補新抱
而將再任嫲嫲的拉姑則落力煲湯水滋補新抱仔，務求生個精靈BB。
文：影視組