在亞視節目《香港亂噏》中扮木村拓哉令人捧腹大笑、片段更熱爆You Tube的盧海鵬，最近忙於為舞台劇《審死官》綵排，扮嘢鼻祖鵬哥絕不怕被外間將他與周星馳作比較，他覺得「冇壓力」，反而其他演員卻很大壓力，驚鵬哥隨時「爆肚」。
盧海鵬和朱咪咪擔正演舞台劇《審死官》，其他演員還有李龍基、柳影虹、寶珮如等。盧海鵬扮演狀王宋世傑，而朱咪咪扮演其妻，由於周星馳和梅艷芳亦演過《審死官》，外間難免將他們作比較。
有乜好比較
問鵬哥會否感到壓力？他說：「冇壓力，有乜好比較。舞台劇就成日做，最緊要係記好對白，同埋要有足夠時間綵排，舞台劇係需要大家配合。」
監製楊紹鴻大爆其他演員與扮嘢鼻祖盧海鵬合作反而有壓力，最驚他「爆肚」應接不下，盧海鵬則說：「對白嘅嘢，多有多講，少有少講啫。」言下之意「爆肚」是必然發生的事。
初演舞台劇
入行多年的朱咪咪原來是首次參演舞台劇，雖然演出經驗豐富，但今次也是戰戰兢兢，她說：「楊紹鴻搵過好多次我都推咗，因為我覺得咁多場戲嘅對白，邊有可能記得到㗎，依家最驚係記對白，都提議過可唔可以整部字幕機，萬一唔記得都有得救。」
舞台劇下月2日在新光戲院上演，問到朱咪咪可擔心盧海鵬「爆肚」﹖她說：「驚㗎，咩唔驚呀﹖雖然唱歌經驗豐富，但演舞台劇係兩回事，考你嘅即場反應，接唔到就接唔到。」
採訪：影視組