雖然並非多產導演，但陳德森這個名字對觀眾來說並不陌生，當年的《特務迷城》、《童夢奇緣》，關鍵是他起用了具分量演員，不過於其人生字典當中，演員還不及故事重要。對於新作《十月圍城》，陳德森表現眉飛色舞，這部單是搭景已花上四千萬港元的電影，內裏一磚一瓦均真材實料，他謂：「最貴係石板街，真係打晒樁，起得樓嗰隻！」

劉偉強夠老友

回想拍攝點滴，陳德森自爆當拍到一半，已預計到該片原定的煞科日子根本不能成事，一天晚上致電老友劉偉強傾訴，沒料對方翌日即單身飛赴上海直奔片場，當時對方還說「我係嚟救火」，此話令陳德森深受感動，及後睇景一輪，兩人便分組拍攝，陳還笑指對方拍攝速度比他還要快，對於老友拔刀相助，陳德森坦言稍後會為劉偉強執導新片《精武風雲．陳真》當演員作為回報。

對於影壇近年鮮有新面孔，偶像歌手、電視藝員也能登大銀幕，陳德森直言油頭粉面演員的確大有人在，但如要說比較優秀，他首推於《跟蹤》嶄露頭角的徐子珊：「我覺得佢幾好！不過真係要珍惜呢啲羽毛，唔係一打開電視就見到你，咁點解要入戲院睇你呢？如果決定走入大銀幕就要收掣囉！男仔就睇好陳偉霆，夠活力同朝氣。」

謝霆鋒有驚喜

陳德森亦不諱言內地演員演技比本地薑標青：「范冰冰演感情戲好投入，叫佢喊十次都有眼淚，唔同香港嗰啲第三次就要滴眼藥水，起初覺得冰冰係花瓶，拍完後感覺唔同晒！謝霆鋒亦畀到我驚喜，初頭以為佢靚仔有型又打得，真係有啲擔心，但佢可放低包袱，三日三夜唔落妝做下人角色，將來一定係香港代表！」至於霆鋒太太張栢芝，陳德森笑指對方是他一直夢想合作的對象，並早已為她度了一個整容故事劇本，有大量內心戲，男主角方面本來未有定案，但與霆鋒合作過後，陳德森認為由他倆來合演應有不錯效果。