即將在本月十五日舉行處女演唱會的江若琳（Elanne），近日除了積極練歌、排舞及做運動操fit自己外，日前還抽出日半時間到山東為之前拍下的內地劇《男兒本色》宣傳，令到原本已欠缺休息的她更加疲累。不過對於Elanne來說，最慘不是休息不足，而是失掉賺大錢的機會。

內地人氣升

據知，由於Elanne在劇集《學警狙擊》帶挈下在內地人氣急升，短短一個月已有兩部內地劇想找Elanne做女主角，可惜由於Elanne近期要練歌排舞，實在無法擠出空檔，惟有忍痛推掉過百萬人民幣的合約。

不過，向來專業的Elanne樂觀地表示：「係有人搵我拍劇，酬勞仲好可觀！可惜最後都係夢一場，冇計啦，第一次開演唱會梗係要用多啲時間準備，唔可以失禮人。（聽聞成百萬？）差唔多啦，不過新一年都有電視劇斟我演出，到時補番數咯，錢搵唔晒嘅。而且我聖誕同新年都出席咗唔少活動，都賺到啲嘅！」

買特產手信

其實Elanne的山東之行還有徐正曦及寰宇內地新人劉梓妍，雖然行程緊密，但Elanne依然爭取時間買山東特產紅棗作手信，更與當地fans合照留念。

文：影視組