踏入2010年，祖兒和基仔已滿腦計劃，誓要再創佳績。剛在樂壇度過十個年頭的祖兒，正式踏入三字頭，展開人生新階段，對新一年新轉變，祖兒說：「有改變係好事，入行咁多年，好多人支持我，最特別係去年一個關於我入行十年嘅首映會，請咗好多好朋友捧場，好感動好親切。」祖兒表示今年會為自己訂下更大目標，她說：「我會專注唱好啲歌，仲會出一張最佳唱片，以及向國語唱片市場進發，到年底就會喺紅館開騷，聽落好似好易，但所有計劃全部不容有失。」

祖兒形象突破

祖兒又表示要保持創作的「飢餓感」，她笑稱：「靈感創作要Keep hungry，好似歌路同形象上要玩多啲。」至於友情方面，祖兒說：「我覺得自己幾富有，身邊有好多好朋友，大家真心用時間交流。」

而已做了Kubi「老竇」的基仔，唱歌、拍戲、做主持的佳績有目共睹，今年他再進一步投身商界，他說：「今年計劃出三張唱片，仲會傾一啲電影嘢，同埋會做生意，做關於服裝上嘅嘢。」問到是否已做了「吸金王」？基仔謙稱：「我只係爛Gag王，我都係搵兩餐，今年再搵多兩餐。」

基仔父性大發

自從主持《係咪小兒科》後，基仔的主持形象深入民心，與小朋友亦相處融洽，他笑謂：「我不嬲鍾意同小朋友玩，佢哋真係好勁，其實對小朋友唔好太嚴肅。」基仔直言相當喜歡小朋友，但未有生育計劃，他說：「我好鍾意小朋友，（恨唔恨有？）恨嘅。（快啲生？）我盡量啦，見到吳家樂同李克勤都做咗老竇，我都為佢哋開心，自己都父性大發。」

採訪：張國文　攝影：馬永堅　場地：The Mira Hong Kong