唱而優則演的阿Sa，日前拍攝一場與高海寧在半空對打的戲份時棄用替身，親身上陣在貨櫃頂跳來跳去，結果換來手瘀腳瘀的「戰績」，連臀部亦被威吔勒痛，但阿Sa專業地說：「如果身上冇傷咪即係唔認真？有番啲傷先得嘅！之前我拍場威吔戲，吊到十幾層樓高，我有畏高㗎，好驚囉！套戲有好多動作，好在我之前拍過動作片，應付到啫！唔使埋位嗰時，我仲捉住樊少皇叫佢教我功夫。」

放大圖片	阿Sa與高海寧的替身有不少打戲。	真人

君如搞gag笑翻天

阿Sa稱拍攝期間，難度最高的竟是跟吳君如合作！她笑言：「因為要忍笑囉！好開心同片有好多搞笑演員，一埋位就度爆肚gag，笑死我。戲中有場戲講我選美，要着泳衣同旗袍，不過以我身材都知冇嘢睇啦！」王晶則對阿Sa的專業精神讚不絕口：「呢齣係阿Sa演得最生猛嘅喜劇，可能有兩、三個高手同佢過招，所以我相信齣戲票房會OK，稍後我會再搵阿Sa合作。」

而初涉影壇的高海寧雖未有親身演出高難度鏡頭，但她說：「拍住阿Sa、吳君如，我好怕會NG，加上套戲好多動作，所以壓力好大，君如見我緊張都有教我，佢好nice。」君如則指女兒經常投訴她忙於拍戲，故打算忙完手頭上的工作，會先抽時間陪囡囡，之後才再接新工作。

拒由鄭中基頒獎

此外，阿Sa在《新城勁爆頒獎禮2009》中勇奪五獎，更第四次奪得「卓越表現大獎」，她說：「之前以Twins名義連續三年攞呢個獎，冇諗過可以攞第四次，證明自己努力得到認同，領獎時閃過好多畫面。（有鄭中基份？）有好多人，（會否以身相許？）唔想公開講。（如果佢頒女歌手獎畀你？）咁爆？我怕招架唔住，腦海一定空白。」

文：影視組