樂壇天后Joey前晚以低胸短裙亮相新城頒獎禮，勇奪六獎成大贏家，風騷滿場飛，Nelson讚Joey打扮甚具天后風範，尤其高跟鞋和飾物配搭，錦上添花。他說：「其實one-piece打扮穩陣卻平凡，Joey聰明地配咗對金色高跟鞋，騷到佢對腳好靚，而飾物配搭襯起成個人Sharp醒晒，好有天后風範！」

漢堡神偷搶鏡

而William和阿Sa打扮亦獲Nelson非常欣賞，他說：「William雖然無着到好閃和穿戴好多飾物，但佢着到好似『漢堡神偷』咁，好搶鏡，已經成功啦！」至於阿Sa黑色貼身皮褲配白色毛毛外套，Nelson說：「阿Sa成功擺脫Twins年代小妹妹感覺，有台型，好有星味！」至於鍾舒漫的服飾如配長褲會更有型。而同樣黑白配的謝安琪（Kay）和吳雨霏都好有型，他說：「Kay條裙好多橫間容易着到人好肥，但因為剪裁好，着得佢好高貴，比過往頒獎禮有進步。」薛凱琪的白雪雪造型亦好襯。

前晚眾多歌手經過悉心打扮，效果不俗，惟楊千嬅突破造型令Nelson「O」晒嘴，他說：「我畀佢嚇親呀，套衫好唔啱佢，顯得佢好肥，佢唔可以着得太過譁眾取寵，將身材缺點表露無遺，佢好似着錯咗Eason嘅衫，Eason就carry到呢款衫！」提到Eason，Nelson認為他與G.E.M.打扮得太普通，他說：「G.E.M.其實可以着得可愛啲！」

阿Sa貼身皮look配白色毛毛外套，Nelson大讚有台型。	William沒有穿閃爆舞衣，單靠誇張款式已夠搶鏡。	Kay揀了一條剪裁很好的裙子，橫間效果不肥反而有型。
薛凱琪高高瘦瘦，白雪雪造型非常襯。	Nelson讚吳雨霏前晚造型恍如專業模特兒。	千嬅突破造型譁眾取寵，Nelson彈她似錯穿Eason的衣服。
Sherman的上衣由很多繩結組成，非常特別。

有信心十連霸

前晚慶功宴上，已連續第九年獲新城女歌手大獎的祖兒，對於明年問鼎「十連霸」信心，她說：「有，明年30歲，係女人重要關口，要再下一城繼續努力。入行十年來都好順利，付出好多心血，依家證明無白費，好感動。（有信心重奪『傳媒大獎』嗎？）有，今年工作對自己有交代。其實今年花咗好多時間發展內地市場，多得班同事同我一齊拚搏，做女仔要自強發揮『girl power』。我最想得專輯獎項，挑戰Eason，佢都攞咗咁多年專輯獎，應該覺得悶啦！」而Sherman自爆長靴由黑色膠紙製成，上衫是綁繩結而成，由於好難除脫她整晚不敢如廁，但強調不是真空上陣。前晚勇奪四獎，Sherman謙說：「全部公司同事功勞，我只係去錄音。剛才領獎時忍住唔喊，但聽到鼓勵說話就忍唔住！」

文：專案組