Fiona因歌曲播放率一度領先，大有機會奪得叱咤女歌手金獎，但她並未抱太大期望：「有人講我已好開心，覺得係大家對我有信心，但我唔會咁就飄飄然，因為希望愈大失望愈大，攞唔到咪好尷尬？況且每個頒獎禮準則、機制都唔同，我唔會計較有冇獎。」
不是一場遊戲
從未攞過女歌手獎的Fiona，認為樂壇這麼多女歌手，拿不到金、銀、銅獎，不代表不成功，她從來不會「恨」有，因為不想為達目標而去做：「咁樣會令自己好辛苦。」曾經有人批評頒獎禮乃遊戲一場，Fiona並不認同：「得到獎就開心到癲，得唔到就話只不過遊戲，我覺得咁樣好矛盾、好假，唔應該咁樣去睇。」
天后要有風範
有競爭才有進步，Fiona視誰為假想敵？她笑說：「好老套！」因為每個歌手風格都不同，她說：「點可以搵其他歌手做假想敵？點為之好過佢哋？」她可有想過躋身天后級位置？她說：「我唔會恨，呢啲名係人哋畀，呢啲名有好亦有唔好，好嘅始終係一個認同，當你去到天后位，就要做到一個天后要有嘅生活方式、做人處事態度同風範，孭咗呢啲名，稍有差池錯誤，就會畀人放到好大去睇。」
文：音樂組
百毒不侵也痛哭
Fiona父親早前被爆欠下周身債，為了爹哋她激動痛哭：「入行多年我已經百毒不侵，爹哋只係普通人，因為我佢先會畀人寫，反過來要爹哋擔心我，我覺得好難受，有問題我哋一家人會去解決，最難捱嘅日子亦過去咗。」
父母總擔心Fiona被人「蝦」，教她要懂得保護自己，愛將心事藏於心底的她說：「唔通話畀人知我幾可憐咩？但原來乜都唔講係好唔健康，只會積積埋埋谷到爆，成個人就崩潰，依家學識同人分享。」
早日「搣甩」祖名
房祖名跟Fiona的緋聞糾纏多年，她笑言預了一世都無法「搣」甩祖名，她只希望將來雙方各自拍拖時，大家的緋聞可以抹掉：「如果我係人哋女朋友，都唔想人哋成日講我男朋友。」Fiona覺得感情要誠懇，互相信任。她說：「人一定會做錯，我好憎人呃我，如果一段關係連信任都冇就冇意思，如果你愛我會信我，就知我會原諒你。」
Fiona盼望找得真命天子，兩人十指緊扣行街街：「拍拖係光明正大，唔需要偷偷摸摸。」
場地：Pacific Place