鄺敏慧表示認識崔建邦始於今年八月拍攝《打出十人巷》節目，其後對方展開熱烈追求，兩人旋即打得火熱；熱戀時兩人拍下不少親密照及甜蜜SMS，中巴都一一保留着，而崔建邦亦不時帶她出席友人聚會，就連玩腳側田亦曾見過中巴；但兩人情侶關係卻因男方不欲公開而一直隱瞞。
「佢性格暴躁」
中巴雖然一心維護男友，但崔建邦卻未有感激，反而常因小事以粗口辱罵，更曾因醉酒而打她，只是今次事態嚴重，才決定爆大鑊。
昨日素顏的中巴由經理人陪同下召開記者會，問到被打經過，她說：「嗰日我哋鬧交，我話要走，佢就想搶我電話delete晒我哋嘅合照同SMS。佢首先襲擊我頭部，我成個人就跌落地下，跟住我想走，佢就用腳夾住我條頸，之後又用手扼住我條頸，扼到我抖唔到氣，有窒息感覺。」中巴續說：「我叫佢放開我，佢冇理繼續扼住我條頸，跟住搶咗我電話delete晒啲相同SMS，我趁佢delete時想走，但間房鎖咗走唔到，佢捉番住我叫我攞番部相機，部相機係佢送畀我嘅，咁我掟番部機畀佢，佢先肯畀番個電話我走。」
據知，中巴離開時，有人追至電梯口，但眼見有閉路電視，便不敢亂來，但就出言恐嚇：「呢件事揚咗你唔使旨意喺呢行立足，我識好多人，我知你屋企住邊！」嚇得中巴決定報警求助。中巴在記者會上被問何以曾被打仍然和對方在一起？她說：「鍾意一個人係盲目，佢話過唔會再咁做，我就畀機會佢，但估唔到佢今次會咁。其實平時我哋相處都好正常，佢性格係暴躁啲，但我都會就佢。我哋嗌交時佢會講粗口，佢又成日提出分手，但幾個鐘後又打番嚟氹我。」
被問到是否介入崔建邦與唐詩詠的戀情？她說：「我哋係８月29日開始拍拖，當時以我所知佢哋已經分咗手，佢仲畀我睇佢哋分手嘅SMS，又介紹我畀佢屋企人識，我先肯同佢一齊。」中巴又謂崔建邦在事發曾三度發手機短信給她，力圖箍煲。
經理人搶住答
記者會期間，其經理人Frankie不時「提醒」中巴展示相片及SMS讓傳媒拍照，又搶着解說：「出面啲人成日覺得佢係第三者，我哋想大家知道佢唔係第三者身份介入。而且有人想否認呢件事。（否認毆打女友？）所以先開記者會證明件事係真，並唔係我哋無中生有；又畀人打又畀人恐嚇，所以先要報警，佢生命受到威脅，我哋唔係黑社會。」在旁的中巴只是不斷點頭附和。記者會歷時約半小時，至下午四時半，中巴由同事陪同下再到公司附近的診所看醫生，約半百記者尾隨診所，儼如做騷！
崔媽媽留口訊補鑊
繼崔建邦先後發三個SMS向中巴道歉及了解事態後，崔建邦的母親亦急急替兒子補鑊，希望Amigo「大步檻過」，崔媽媽曾在前晚七時三十六分致電給中巴，不過當時中巴並未有接聽電話，崔媽媽只好留下口訊：「我係auntie，如果聽到口訊打番電話畀我。」
採訪：名人組