今期gag神請得鍾舒漫出gag題考考大家智慧，佢話女人一世最難完成嘅任務就係Keep Fit，所以要出條同減肥有關嘅題目，睇吓邊個最有智慧！唔知係咪靚女對瘦特別有敏銳觸覺，所以薛凱琪好快就估中，反而「肥嘟嘟」嘅森美同小儀，就點都係啱得一半！
薛凱琪：
咦……食咩昆蟲？我估係……蟲囉，食完會嘔，嘔完咪瘦囉。（唔中呀！）有冇貼士呀（哀怨聲）？（體積好細嘅。）我估係……蟻，因為食蟻獸，食咗蟻會「瘦」，哈哈。
小儀：
吓？食咩昆蟲會瘦呀？好難估喎，係咪食肉獸呀？不過食肉獸唔係昆蟲喎，唔通係……食蟻獸？不過又唔係喎，因為食蟻獸都唔係昆蟲！畀我諗諗先……哎吔，我估唔到呀，放過我啦。（答案係食蟻獸喎！）吓，早知我嘅最後答案係食蟻獸啦，死蠢添。
森美：
問我啦，我估gag題好叻㗎。（食咩昆蟲會瘦呀？）食乜蟲？等我諗諗先，咩蟲呢？我估唔係食蟻獸，因為獸係動物唔係昆蟲，再畀少少時間我諗吓，食咩蟲會瘦呀？唉……放棄，估唔到呀，開估啦！（咪係食蟻獸囉！）點解呀？（食蟻「瘦」呀？）吓，我就係諗唔通個瘦字，激死人。