無綫「金牌司儀」Amigo向來甚得高層痛錫，除了力撐他的陳志雲總經理外，樂易玲及監製錢國偉等亦對他寵愛有加。問錢國偉知否Amigo捲入打人事件，他表示毫不知情：「以我所認識嘅Amigo係斯文人，點會郁手打人？仲要係女仔添！我上次去Amigo嘅生日會，唐詩詠都喺現場，我見到Amigo對佢都好有禮貌。（信唔信佢打人？）了解吓先。」
陳志雲則拒絕就事件作出回應：「至於Amigo嘅工作會唔會受影響，或者臨時抽起聽晚（今晚）嘅《勁歌金曲》主持工作，呢樣嘢就要問番《勁歌》監製。」《勁歌》監製麥鎮東則以放假不清楚事件拒絕回應，他表示若有要主持工作可以由胡蓓蔚頂上。
樂易玲稱：「我唔知發生咩事，要了解過先，（如警方受理會唔會停佢工作？）我會召見佢問個明白，然後再向公司請示，向相關嘅監製、同事了解有咩實際影響，（對佢印象如何？）佢好用心工作，工作認真，對前輩好尊敬，但我對佢嘅感情事唔係咁了解。」