昨晚本報收到消息，崔建邦涉嫌襲擊緋聞女友鄺敏慧，女方事後到律敦治醫院驗傷，隨後報警。據知鄺敏慧昨日與男友崔建邦講分手，因覺男友風流成性，而且常講大話，鄺敏慧對他十分失望，因而提出分手。當時男方要求女方刪除兩人曾經一齊的合照及短訊，有人恐怕日後會被人睇到，但女方從沒有想過公諸於世，只想作為紀念，所以拒絕刪除。此時，有人在情急之下叉住鄺敏慧條頸推佢，還大力打她的頭一下，繼而搶走她的電話delete入面的相片及短訊。鄺敏慧事發後，回到其模特兒公司，感到驚惶，公司建議報警與驗傷。
頸同手腳劇痛
鄺敏慧由模特兒公司兩位工作人員陪同到灣仔律敦治醫院驗傷，逗留醫院約一個小時，在約8時15分由特許人員通知離開，坐上CID車到灣仔警署錄口供。期間被記者問起事發經過：
記：記者 鄺：鄺敏慧
記：你邊度受傷？
鄺：條頸好痛被佢箍到，手腳都好痛。
記：有乜爭執？
鄺：同男友有啲拗撬。
記：邊方面？
鄺：感情方面。
記：幾時？
鄺：今日下午。
記：係咪男友屋企？
鄺：係。
記：你男友係咪崔建邦？
鄺：係。
記：當時傾乜？
鄺：講緊分手。
記：邊個同邊個講？
鄺敏慧身邊的男同事表示：陣間再訪問先講，佢依家好唔舒服，同埋趕住落口供。
鄺敏慧逗留警署約兩個半小時，在10時40分由老闆及員工同出警署，即被記者包圍，被問到事發經過：
鄺：今日下午嗌交，我想走，但佢想要返我哋啲相同啲SMS。
記：乜相？
鄺：情侶相。
記：點解要攞番？
鄺：因為佢唔想公開我哋關係，之前我唔認都係想幫佢，想保持佢嘅知名度，估唔到佢咁無人性打我。（開始哭泣）
記：之前有冇打過你？
鄺：之前佢已有暴力傾向。
記：今日點打你？
鄺敏慧模特兒公司老闆Frankie代答
Frankie：崔生用手打佢個頭，佢企唔穩就跌落地，义住佢條頸。
記：點解咁緊張，係咪有情慾照？
Frankie：無。
記：乜事咁樣？
Frankie：嗌交。
記：係咪講分手？
Frankie：開始嗌交不過依家梗係分手。
記：你哋一齊幾耐？
鄺：八月開始一齊。
記：你係咪介入崔建邦同唐詠詩關係？
鄺：當時佢哋已分手。
Frankie：佢真係好頭暈你哋畀佢休息。
記：要唔要係驗吓個腦？
Frankie：呢啲唔講住。
記：父母知唔知？
Frankie：已通知咗，依家送佢返屋企。
記：崔建邦有冇打畀你？
Frankie：我叫佢熄電話。
峰迴路轉兩個版本
崔建邦與鄺敏慧發生爭執一事其實十分峰迴路轉，事件前後更曾出現兩個版本，皆因在鄺敏慧正式投訴被打之前，曾有人致電及傳真各大傳媒，指崔建邦與鄺敏慧街頭遇襲送院。當第一個版本出現後，記者即第一時間致電崔建邦了解詳情，當時表現平靜的崔建邦回應表示：「無啲咁嘅事，我今日成日都喺屋企，根本無出過街。」崔建邦事後還笑問記者是否一個「同名同姓」的誤會。不過不足十五分鐘，崔建邦動手打鄺敏慧的第二個版本隨即傳出，記者再致電崔建邦時，其已將電話轉至留言信箱，截至截稿前依然未有回覆。
文：名人組
鄺敏慧Profile
姓名︰鄺敏慧
英文名︰Elizabete
花名︰中巴
出生日期︰1989年12月13日
年齡︰20歲
身高︰165cm
三圍︰32、23、34.5
入行經過︰經朋友介紹加入模界，曾與古天樂拍戲，之後參加森美的《十人巷》