《勁歌金曲優秀選第三回》昨晚舉行，賽果如本報日前所料，HKRIA旗下四大唱片公司的歌手全部捧蛋收場，反而造就HotCha及無綫親生女徐子珊、江若琳、農夫等冷手執個熱煎堆，首次打入季選得獎，其中版權最受爭議的改編歌如鍾舒漫的《給自己的信》、G.E.M.的《Game Over》等都未受影響而如常演唱。祖兒坦言更多歌手參與頒獎禮會比較熱鬧，問到會否擔心無綫改為造就「自己人」，她說：「唔好咁講，人哋都有付出，每個機制都唔同，歌手只係參與，冇資格去批評。」英皇發言人稱祖兒的《雙冠軍》及鍾舒漫的《給自己的信》廣東版本的版權屬英皇，故不受影響可以繼續演唱。
最驚冇水吹
另外，昨午於無綫電視城舉行的《十大勁歌金曲頒獎典禮》記者會，「四大」歌手如陳奕迅、謝安琪、薛凱琪及方大同等都全部缺席，墟冚場面大不如前，其中好姊妹祖兒跟阿Sa有如孖公仔，雖然大會安排兩人拗手瓜，不過她們竟突然當眾扮「打茄輪」，認真搞笑。
祖兒和阿Sa笑言最擔心「冇水吹」，阿Sa說：「最大影響係少咗啲friend冇得吹水，好似水神（陳奕迅）、軒爺（張敬軒）同謝安琪咁，依家吹到聽晚都係得我同祖兒兩個人。」而由北京返港的千嬅表示對版稅爭拗全不知情，自己會以平常心參與各大頒獎禮。
版稅到年尾
無綫製作部總經理（綜藝及音樂科）陳家揚表示：「無綫同唱片公司係朋友，大家只係暫時停止合作，唔係永遠，（減低頒獎禮認受性？）唔會，一直係音統負責考慮同投票，版權係考慮因素之一，只係有一、兩個歌手冇得被投票。（影響總選？）件事未完，或者聽日就和解呢？」問到會否繼續禁播「四大」的歌曲MV，陳家揚稱：「呢啲仲傾緊，其實今期版稅去到年尾，（未到期點解唔播？）我哋唔想有手尾，大家協議咗傾掂先！」
此外，據知今晚舉行的TVB8金曲榜頒獎典禮亦會同一局面，得獎歌手包括曹格、周筆暢、容祖兒、泳兒及張芸京等，四大唱片公司的歌手包括周杰倫、方大同、陳奕迅等大熱人選都被迫空手而回。
採訪：音樂組、影視組