近月伊健既要到處宣傳電影《風雲II》，又推出新碟及籌備演唱會，忙得不可開交，早前他難得留港，馬上抽空到寓所附近跑步練氣，一身運動裝束的他邊聽着音樂邊跑，喪跑一小時面不改容，就連被記者攝入鏡頭仍懵然不知。

出名大細路的伊健，拿起玩具時雙眼發光。	身為藝人，伊健亦要乖乖排隊付款。	近日積極備戰的伊健，閒時到寓所附近喪跑練氣。

買得瘋狂

日前伊健完成電台宣傳工作後，即與三名工作人員前往尖沙咀海運大廈，並急步走入玩具反斗城，只見伊健瘋狂將各式各樣玩具放入手推車中，並貪玩的拿起玩具槍把弄一番，數分鐘後才依依不捨走到收銀處付款，等候期間伊健更一度咬手指解悶，並發現記者拍照，伊健禮貌的企定定讓記者拍照，並透露買了近三千元玩具。

引來騷動

之後伊健着工作人員代他將戰利品拿上車，自己則和另外兩名工作人員急步向另一邊方向行，原來伊健見商場外有大型的聖誕燈飾，故專程走到戶外拍照留念，然而他的出現馬上引來小騷動，不少途人更爭相要求合照及簽名，嚇得伊健逗留數分鐘便雞咁腳走人。

記者上前跟伊健做訪問，他透露玩具會於聖誕節期間送給「鄰舍輔導會」一班智障人士，原定聖誕節有三天假，但因要為老友陳小春武漢的個唱擔任嘉賓，故假期泡湯，問女友蒙嘉慧可有詐型？伊健表示：「冇，我都冇投訴佢添呀，佢拍緊劇仲忙過我！（女友一份禮物都冇？）唔使啦，我哋講心唔講金！」

文：音樂組