「萬千星輝頒獎典禮2009」昨晚舉行，眾花旦豁出去露肉賣性感，有性感尤物之稱的呂慧儀與同是港姐級的郭羨妮平分秋色，同以大Deep V上陣，但以中門大開露半球的慧儀較為搶鏡，成為性感之冠，而實力派謝雪心則以過億行頭突圍。
台慶頒獎禮昨晚在電視廣播城舉行，一眾花旦為獎項爭崩頭之前，率先於紅地氈上拗手瓜鬥性感，各女藝人均悉心打扮，盡騷天賦本錢。
鑽鏈攝胸穩陣
繼台慶夜行性感搶盡風頭後，呂慧儀昨晚再下一城，身穿金銀色Deep V大露背長裙、中門大開露半球，一身珠光寶氣的她，因鑽石鏈吊在波罅有點殺風景，慧儀風趣的說：「咁樣條鏈好穩陣，我感覺到佢喺度嘛！（你仲性感過視后大熱鄧萃雯，怕唔怕畀人話搶風頭？）唔關事，我努力支持公司盛事。」同以Deep V上陣的郭羨妮（Sonija），露出Ｘ字胸，去年頒獎禮她因性感服飾慘成笑柄，今年無懼再行性感，Sonija大方地說：「我唔理咁多，最緊要係靚囉！」
楊怡摸胸升Cup
候選視后方面，性感的楊怡透露已打了底做足防走光措施，近日特別為胸部按摩及飲木瓜湯升Cup：「總之要胸部堅挺，想個Size坐Ｃ望Ｄ（Cup）。」另兩位視后大熱佘詩曼及鄧萃雯則較為密實，阿佘以黑色Valentino Tube Dress配周大福過千萬鑽飾，雯女穿白色斜膊裙，被指衣着普通，她笑說：「係你哋鹹濕，性感唔一定露肉嘅。」
不過，亦有刻意打扮卻稍嫌奇特的裝扮，如以桃紅孔雀開屏圖案服飾亮相的汪明荃，聲言今年玩前衞、胡杏兒則以花喱綠裙出現，似有欠大體、鍾嘉欣則玩型格，服飾由鄭兆良度身訂造，但其飛機頭再加大熱的Pagoda Shoulder三角形膊頭果真「另類」。男演員方面，角逐兩獎的謝天華以真空西裝出現，黎耀祥則把頭髮Gel起，被取笑浮誇。
文：影視組