由籌拍、易角到上映，Stephen為星爺監製的新片《跳出去》整整拍了三年時間，難怪他無奈表示「人算不如天算」。對於《跳》片被指甚有「周星馳影子」，Stephen大方表示：「拍喜劇邊個及得佢吖！當張藝謀新片都話抄襲佢嘅時候，有佢嘅影子點計都係一件好事嚟嘅。」

遠赴荒山野嶺開工

Stephen指星爺其實不算太有控制欲：「佢淨係要求我盡量做到農村feel啲，大家開會意見當然有，但最終佢都係同我講『你係導演，你決定啦。』」至於彼此關係，Stephen不諱言合作期間經常碰面：「都係開吓會咁囉，唔會約出嚟食飯傾私事。」

劇情交代張雨綺（Kitty）扮演的村姑戀上跳街舞，打算到大城市「舞出頭」，期間遇上富家子立威廉，發展出一段愛情故事。Stephen不諱言農村背景是血脈所在，難怪他花去不少時間睇景，且長途跋涉遠赴「荒山野嶺」開工：「喺上海要揸五、六個鐘車先到，仲要行半粒鐘添。」

電影拍竣後忽然要易角重拍，製作費因此額外加添了二十個巴仙，問到為何選中立威廉執二攤？Stephen即謂：「好簡單，因為佢着起西裝感覺就係一個CEO。」

張雨綺跳到上天台

至於Kitty同樣是他心目中的最佳女主角：「記得第一次喺星爺公司見到佢，當時話佢學緊跳街舞，星爺叫佢表演兩招，竟然由office跳到上去天台，當時佢畀我嘅感覺，就同角色冇乜兩樣。」Stephen又自爆易角之初，電影公司曾叫他兼任男主角，奈何他未有就範，只以「串星」身份亮相。

文﹕影視組