陸永早前舉辦talk show反應熱烈，最近更獲3香港輯錄成七個單元，上載到手機網站讓fans重溫，其中一part「遭警察查身份證」，原來乃係其多年經驗：「高峰期起碼一日一次畀警察『查牌』，我同幾個阿Sir都因為咁而做咗朋友，都有叫佢哋嚟睇我個騷架。」

追車欲見黃子華

陸永坦言早前開騷最失望是未能邀得「偶像」黃子華成座上客：「佢要為自己個騷『閉關』嘛！其實有次我終於喺一個公開場合遇到佢，諗住同佢打招呼，佢又咁啱上咗保母車離開，我咪喺後面追車囉，點知都失敗。」陸永還大爆從陳偉霆口中得知，子華曾在開騷的中場休息期間，亦手持一本厚厚的英文書翻閱，才子氣息實在令他「驚嘆」！

陸永自言入行以來，自己亦甚有「前輩緣」，得到麥玲玲、曾志偉等提攜，早前在無綫台慶騷綵排時，他跟C君更膽粗粗去「撩」鄭裕玲：「嘟姐（鄭裕玲）原來畫得一手好畫，我先去問佢攞電話，繼而再問佢可唔可以送幅畫畀我，嘟姐就話遲啲先，因為同我唔熟。（咁點算？）我喺綵排結束前再問佢：『嘟姐，依家我哋夠熟未？』囉！」

陸永表情多多，又口甜舌滑，氹得鄭裕玲考慮「賜畫」。

放大圖片

讚關菊英rap得型

陸永的「厚面皮」令在場人士忍俊不禁，他卻自有一番理論謂：「我哋對前輩應該要尊敬、欣賞，同埋唔怕接近佢，好似菊姐（關菊英）聽到我哋唱歌，仲喺台下手舞足蹈咁rap埋一份，我覺得佢不知幾型呀！」難怪繼與麥玲玲合唱後，陸永有意拉攏嘟姐為農夫新作作「聲音演繹」，不過一切言之尚早，成功與否還看未來日子口甜舌滑的他能否與對方「混熟」！

文：影視組

攝影：馬永堅

化妝：ManYee

髮型：Renton Hung@Via Il Colpo

場地：海逸君綽酒店