ontv《娛樂onShow》內容抵死啜核，深受觀眾歡迎。今次邀得「Sing呢」成功的官恩娜（Ella）與中日代表日華接受訪問，二人在訪問中火花四濺，實行將港日交流推向高峰。
成為網上必睇藝人清談節目的《娛樂onShow》，每次都邀得城中不少話題藝人接受訪問。早前在《超級巨聲》被雷頌德激讚、原好識唱歌的官恩娜，以及擁有日本及香港雙重身份的Rapper日華，在節目更大談今次港日合作經過。
互笠高帽
日華說：「我喺日本不嬲唱開中、英、日三國語言嘅歌，今次出第三隻碟，日本嗰part我唔想自己唱咁dry，所以咪問吓王友良有冇好介紹，佢就畀咗Ella嘅歌我聽，我覺得Ella真係唱得好好，咁就促成今次Crossover。」Ella亦為日華戴上高帽：「好可惜我識佢之後先聽佢嘅歌，好幸運第一次見面就睇到日華嘅表演，睇完之後，我即刻上YouTube搵番佢嘅MV，連我阿哥都話正。」
事業為重
近日人氣急升的Ella成為大忙人，工作不斷。她說：「嚟緊我會出碟，依家對自己會更有期望，愈有期望就有愈大壓力，好怕自己會唱得唔好！」Ella在節目中又大談與男友J醫生的關係，原來她與J醫生曾傾過結婚問題，不過現時以事業為重。
擁有baby face的日華，原來早已在日本成婚，更誕下一女，取名香華。日華希望多讓囡囡學習中國文化，促成中日交流。
文：專案組