劉美君（Prudence）早前推出新碟《Queen of Hardships》，頭戴荊棘后冠拍攝唱片封套，充分表達這位非常王后的個性——堅忍而強韌。新碟的歌全都是她的選擇，Prudence謂：「其實我一直都係自己監製，自己想做嘅嘢只有自己先知，我次次都做好晒先同公司講，我怕講咗人多意見多！」當年她的《午夜情》唱到街知巷聞，但Prudence認為那都是別人的故事：「完全冇自己嘅個人感覺，依家我有番咁上下起跌，應該分享自己嘅睇法，所以新碟所有歌都係講我自己！」

初時覺老土

至於王后何時「登基」？Prudence說：「前幾年身邊嘅人話我喺樂壇嘅位置無可取代，呢種歌、呢個形象只有我，於是開始叫我做Queen，初初我覺得好老土，唔鍾意人哋稱王稱后，做碟期間都諗過用Queen，後來覺得其實我都係喎，可能我個人好簡單又樂觀，成日自怨自艾嗰啲唔係叫Strong，太私人嘅嘢我唔會講，過咗就算，所以先諗到隻碟叫《Queen Of Hardships》。」

承認有弱點

早前為《超級巨聲》擔任主持，被外界狠批做得差，Prudence自有一套見解：「當日無綫搵我都係想搵個有音樂背景又肯講嘢嘅人，我覺得都幾像『我』呀，呢個係大騷，我冇經驗又冇方向，其實算做得唔錯喎，好多人以專業司儀嘅標準去睇，自然覺得唔好。我知自己有弱點，我承認我有，強者就是承認自己有弱點，唔係逞強！好似舊年圈中嗰件事（慾照風波），我好有印象，做錯事咪認囉，點解要收埋？我唔會，就係夠強先面對到，弱者咪唔承擔、唔面對囉！」

文：音樂組

攝：沈健程

化妝：Kris Wong

髮型：Gary Sun@ Le Salon

形象指導：Crystal

場地：香港君悅酒店咖啡廳