樂隊RubberBand即將於Star Hall舉行《RubberBand Concert#1》處男演唱會。對於唱片公司金牌大風最近被是非纏繞，RubberBand就一於少理，坦言未受影響。

他們說：「一路都感覺到公司投放緊資源畀我哋，所以從來冇擔心過。小肥都有同我哋講笑話『呢排傳緊out你哋喎』，咪當宣傳手腕囉。」

夾band多年辛酸史數不完，RubberBand甚少將問題掛在口邊，泥鯭說：「阿偉成日都話食得鹹魚抵得渴，咁依家又有多咗贊助商，如果身光頸靚，又嗌窮好似好精神分裂。」

問到演唱會會令觀眾有何得着時，藝琛說：「希望係一個RubberBand同樂迷嘅里程碑，同大家進入另一個階段。由於星期一開騷，希望大家睇完，唔會再討厭星期一，如果可以將呢個個唱帶到唔同地方就當然更加好。」

包容隊友

談到演唱會主題曲《發現號》，負責作詞的6號自爆曾大發脾氣，受害者正是有份作曲的阿偉，阿偉則維護6號說：「我唔覺得畀佢發脾氣喎，明白過程好急，其實大家都係為件事好，首歌可以話係我哋嘅心聲，亦係送畀所有人嘅禮物。」

RubberBand坦言希望邀請曾合作過的吳雨霏（Kary）與林海峰做嘉賓。貌似林海峰的泥鯭說：「Kary撞咗期，至於林生答得好玄，話嗰日要踢波，咁係咪即係踢完波會嚟呀？」

吳雨霏有機會做RubberBand演唱會嘉賓。（資料圖片）	泥鯭與林海峰的樣貌確實十分相似。	林海峰

文：音樂組

髮型：Mad Ho@IL Colpo TST

服裝：www.beponline.com.hk

場地：Termini Caffe