樂隊Mr.日前出席動漫節開幕活動，大會向他們送上鬼太郎上衣，並安排五子為麥兜設計萬聖節服飾，MJ搞笑為麥兜畫上巫婆帽配黑色底褲。Ronny表示自小已喜歡看麥嘜：「嗰時淨係得幾個角色，仲未有麥兜，後來睇住佢哋返學、識新朋友，有啲當佢哋係屋企人嘅感覺。」他們大讚麥兜卡通富教育意義，希望能為其動畫配音。Alan自爆妹妹是Cosplay迷：「每年都會扮唔同嘅動漫角色。（造型性感？）佢唔玩性感嗰啲，佢扮女神，初初我都問佢做乜搞呢啲，後來感染埋我表弟一齊Cosplay，睇睇吓都幾靚。」Mr.歡迎歌迷以他們作Cosplay對象，Dash笑謂：「扮MJ最易，畫條眼線就得啦！」