楊千嬅與丁子高（Real）雖已註冊，但仍過着「分居」生活，對於有指Real父親送豪宅給他們作愛巢，Real承認有看過該處，而母親亦正物色地方與千嬅一起居住。
早前有報道指Real獲父親送贈位於上海的二千多萬元豪宅給他與千嬅作愛巢，對此，昨日Real以公關身份出席Fendi時裝騷時表示：「老實講我係有睇過嗰度。（爹哋已經買咗畀你？）總之我有睇過，睇得都鍾意。（話你媽咪都會送樓畀你哋？）我依家同媽咪住緊陽明山莊，佢都搵緊地方，想搬大啲等千嬅都搬埋入嚟住。媽咪話樓價仲未穩定，再睇吓先。（佢一早有咁嘅計劃？）唔知，可能想畀驚喜我。（咁千嬅咪同奶奶住囉？）佢哋相處得好好，媽咪好錫佢。（千嬅好識氹你媽咪？）唔使氹，我媽咪淨係見到佢都開心。」
自己有錢開公司
兩人明年擺酒後便會正式「同居」，而Real亦否認是父親打本給他開公關公司，他說：「開公關公司唔使好多錢，我自己都搞得掂，我做咗咁多年嘢都應該開到嘅。（想喺上海開公關公司？）我不嬲有呢個Plan，不過都先喺香港扎好根基先。」千嬅將要到北京拍戲，問到他可會掛念老婆，他說：「唔一定要分隔咁遠先至掛住。」
知慳識儉唔嘥嘢
另外，楊千嬅前晚出席Nike Sportswear《AW77-This Is My Hood》Exhibition開幕派對，對於有雜誌指Real有家底，她笑言：「佢底子幾好，健身係托米。」Real早前被拍到有肚腩，千嬅即為老公說好話：「佢個人好知慳識儉，唔會浪費食物，每次打邊爐食剩嘅都係佢食埋，如果雜誌影到佢有肚腩，老公好大罪惡感，佢都好貪靚。（有冇互相監視唔好食咁多？）佢有監視我，但佢又勁食，食埋我碗飯。」
文：名人組