未婚前，間唔中都會撞到偉仔夜蒲飲吓酒，結婚後，夜生活近乎零，一下子變成「男版灰姑娘」，唔怪得嘉玲咁放心，經常獨留老公在家中。上星期大約晚上八時許，難得撞到偉仔喺佢去開間飯堂Amigo開餐，同枱有兩位導演死黨麥兆輝同莊文強，三個大男人見到不知傾得幾開心，可能知道偉仔慣咗早睡早起，佢哋未夠十一點已經叫埋單。

表現有禮

當偉仔行出門口望到有記者拍照，即時亦表現得好有禮貌，主動笑吓先上車，知道記者想問嘢仲特登傾前個身，叫個外籍Bell Boy唔好閂門住，聽到個記者問佢隻手係咪好得七七八八，偉仔馬上好爽快話：「係呀！」至於佢部《一代宗師》幾時正式開工，佢竟然答話：「我都唔知喎！」送走偉仔後八太即時打畀麥兆輝，問佢係咪有新戲斟偉仔，麥兆輝笑住話：「唔係！我哋有時間就會一齊食飯，冇咩特別。」

我行我素

至於近日周旋喺杧果同黛黛間嘅城城，就鍾意打邊爐多過食西餐，成夜晚十點幾先見佢揸住架平治喺跑馬地間「愉記」蒲頭，呢種毋須睇時間交人，想點就點嘅單身貴族專利，睇怕唔會輕易放棄。

文、攝：追蹤組