無綫重頭劇《宮心計》一班演員昨日出席「2009福幼慈善大纜盃」活動，當中緋聞男女鄭嘉穎和佘詩曼在鏡頭前雖未有交流，不過鏡頭後，二人卻「打情罵俏」，阿佘對於嘉穎日前被指在馬國受訪時發脾氣一事表示質疑，大讚對方EQ甚高。
阿佘昨日與關菊英、陳豪、鄭嘉穎、謝雪心、葉翠翠等同劇演員出席「2009福幼慈善大纜盃」活動，期間更即場進行拔河比賽，共籌得六萬元善款，現場天熱加上大動作「運動」，令演員們個個「標汗」。
負面新聞當宣傳
阿佘受訪時，被追問對嘉穎被指在馬國遭追問緋聞而發脾氣的感受，她說：「唔知，我唔喺現場，係咪真㗎？（你EQ咁高會唔會過兩招畀佢？）佢都高㗎。（驚唔驚你哋緋聞沒完沒了？）順其自然，無論咩新聞都好，話我同阿怡、同嘉穎、同靚靚嘅新聞，我都當係宣傳，總之幫到套劇收視嘅話，我都可以接受。（樹大招風？）頒獎禮前夕係咁，我都慣晒。」
當嘉穎受訪時，阿佘突然在附近指着他謂：「我幫咗你澄清喇！」嘉穎聞言即四萬咁口表示唔該，事後他謂：「阿佘讚我EQ高？多謝佢。（喺馬國發脾氣？）當時我態度非常好，完全冇發脾氣，法拉可以做證，明白傳媒工作關係一定要問，所以呢幾年EQ愈嚟愈高，因為好多周刊報道都唔係事實，咁樣訓練，EQ點會唔高？」
陳豪冇打算讓獎
黎耀祥、陳豪則前後腳到場，陳豪對祥仔叫他「讓獎」給他，笑稱祥仔實至名歸，不須讓獎。
文：影視組