27/10/2009

播放本新聞相關短片

衛蘭處女下海喊贏JM

衞蘭(Janice)和文詠珊(JM)即將夥影壇前輩狄龍拍攝由老闆黎明投資的愛情電影,日前二人跟狄龍試戲,演出父女爭吵戲份,處女下海的Janice七情上面兼淚如泉湧,雖有指雙J爭戲份,但Janice未踩入片場便先「喊贏」一仗!

Janice、JM及男新人Aarif(李治廷)日前獲最佳新進導演郭子健親撰劇本,並為眾人試戲。故事講述父親阻止女兒與已婚男友拍拖,愛得盲目的Janice卻堅持戀愛大過天,父女因而發生激烈爭吵,零拍戲經驗的Janice埋位前獨坐一旁,培養情緒及唸對白,至正式埋位,Janice面對前輩狄龍不但毫不怯場,眼淚更如開水喉般流個不停,就連睫毛液溶掉也一於少理,最後Janice成功一take過,導演叫cut後亦大讚:「做得幾好!」

宜改咬字走位

JM與狄龍做對手戲時,因她早有多次演戲經驗,故演繹反叛少女亦入木三分,有過「一戲經驗」的Aarif亦投入演出。事後,狄龍逐一為三人評分:「JM記性好,但係咬字有少少不清,走位亦有待改進;Janice嘅可塑性好高,情緒嘅爆炸力控制得好好,惟係有少少鬼妹仔嘅口脗!」

拼音硬記對白

首次做戲便獲老前輩盛讚,Janice謙虛表示:「其實都有少少緊張,但龍哥好好戲,帶到我入戲之餘,仲教識咗我好多嘢!」Janice坦言不懂看中文,為硬背寫滿拼音的劇本,要比其他演員用上雙倍時間。為免被看死鬼妹仔不懂演戲,Janice每日不停背劇本、練表情,誓要成為唱而優則演的專業藝人;JM亦坦言會虛心接受批評,努力鑽研演技。

此外,Janice前晚帶同師弟Aarif出席慈善唱K活動,她自言常在家中唱K練歌,更試過凌晨三點練歌被鄰居投訴,她又說可連續唱K十小時也不覺累,最高紀錄是唱了十三個小時。

採訪:音樂組