【洛子皓澳門直擊】天王郭富城將於明日生日，昨日以代言人身份現身Longines澳門旗艦店開幕儀式及慶祝商標註冊120周年紀念展覽，戴上價值$80,800新款名錶的城城，瞭如指掌般透露緋聞女友熊黛林（Lynn）將不在港，因此未能共度正日生日，又言自己預計在港度過，他說：「夜晚會同同事、好朋友食飯。（好友包括Lynn？）唔會喇，聽講佢唔喺香港。（好清楚喎？）我都係睇報紙知道。」
否認與伊健不和
城城又言今天（25日）應該會為《風雲II》錄製主題曲至凌晨，或到澳門金光綜藝館主持網球比賽開球儀式，而27日即趕回泰國拍攝《B+偵探》，提到被指與鄭伊健因唱《風》片主題曲傳不和，城城即否認指大家一條心為宣傳好，並指無傷害兩人友誼。
限量錶兩個人戴
大方暢談Lynn的城城，提到一車斷正的緋聞女主角王秀琳（Mango）生日將至，即封口拒作任何回應，實行以行動與Mango一刀兩斷，劃清界線。此外，城城於展覽中就睇中一對限量名錶說：「得120對，係紀念版。（廣告商送？）遲啲喺晚宴先問，如果唔送都會買嚟收藏。（兩個人戴？）呢個款唔係一男一女款，啱男仔多啲，當然女仔都可以戴，不過都係收藏多。」與廣告商合作四年，城城透露酬勞有逐年提高。
文：音樂組