剛於八月中成為丁太的楊千嬅，前晚擔任無綫節目嘉賓，大談老公老婆的地位。她不但力撐與老公丁子高關係非女尊男卑，更不惜自踩來抬高老公地位，認真用心良苦。
千嬅與張繼聰前晚應汪明荃、鄭裕玲（嘟嘟）、曾華倩邀請，擔任新節目《至八女人心》嘉賓，此集題目為男女地位，討論娛樂圈夫妻之間的壓力。
女人講溝仔
問到丁子高可有壓力？千嬅即說：「冇乜壓力，佢OKo架，佢包容我至一齊。佢做公關工作，都算係半個娛樂圈人。（但外邊覺得你哋女尊男卑！）人哋講啫，唔係事實！我年紀大過佢，但佢腦袋大過我，人又高過我。」早前丁子高被問到老婆炒樓勁賺，他即表示自己都是「叻仔」，千嬅聞言後即連讚老公十多句：「答得OK喎！呢啲咪OK囉！佢有咁嘅轉數，我哋至溝通到。」
《至》幾位主持都牙尖嘴利，千嬅謂與她們都合作過，大家都客客氣氣，故不介意傾這類「港女」話題。千嬅說：「男人坐埋講溝女，女人講溝仔o架啦！（你咪冇得講溝仔？）唔講溝仔咪講生仔囉，與時並進嘛，講講吓就生o架喇。」
嘟嘟冇「情」講
嘟嘟與華倩透露節目共有五集，之後或會添食，稍後還會邀請「至八會」成員做嘉賓。華倩說：「大家都做咗幾十年人，可以交流下唔同嘅睇法。（會唔會交流愛情心得？）都會o架。」不過在旁的嘟嘟即問華倩：「你真係會o架？我唔會喎！話咗唔會再講，唔好再預我。」
另外，汪明荃與羅家英出席《明愛迎囍良緣宴》，現場有四十二對長者新人，汪明荃坦言很感動。雖然她結婚時未有穿婚紗及擺酒，但拍劇亦試過，不會感到遺憾。
文：影視組