關菊英對於劇集首播成績斐然，感到十分雀躍，她高興地說：「好開心，今晚咁啱一齊食飯。（預備用幾多錢請食飯？）冇諗，最緊要食得開心，其實一早想食，因為套劇拍時好開心，拍完有失落感，好想再聚，今次難得有機會人齊。（收視再好會唔會再請？）佢哋話輪住嚟請，可能輪唔到我，套劇咁多演員，可能食飯都食肥。」而鄭嘉穎、米雪雖然因公事未有到場，但其餘該劇演員佘詩曼、楊怡、陳豪、謝雪心、惠英紅、葉翠翠、蕭正楠等均有出席，場面熱鬧。

關菊英（中）表示與佘詩曼（左）、楊怡拍《宮》劇拍得開心。	關菊英（後左五）宴請一班《宮》劇台前幕後工作人員。	謝雪心開心被讚。

仲有進步空間

其中楊怡認為可能《宮》劇與《大長今》同樣有童年戲，所以大家先覺得似，揚言日後劇情發展與《大》截然不同，呼籲觀眾耐心細看。而問到她會否因收視理想，對競逐視后打了強心針？她謂：「從來冇諗過喺呢套劇攞獎，反而好想知道大家對我演奸角嘅反應，雖然獎係個個都想攞，但我覺得自己仲有進步空間，得唔得獎都唔在意。（鄧萃雯唔係無綫親生女攞獎機會微？）唔關事，獎項由觀眾決定，公司都會聽觀眾意見。（收視好會否請食飯？）會，因為真係好值得振奮，希望今晚收視推向四十點。」

謝雪心喜被讚

此外，謝雪心對於網友大讚她太后一角，她說：「多謝支持，知道網友讚，感到衷心微笑，好有暖意，雖然只得短短十五集戲，但希望依然留在觀眾心裏。（有網友指楊怡唔夠奸？）唔可以咁快下定論，慢慢會轉變。」

此外，有雜誌指佘詩曼承認與鄭嘉穎曾發展過，但最終都沒有結果，昨日問到佘詩曼此事，她坦言：「講過嘅嘢就係事實，唔會再回應，（咁係咪間接認拍拖？）我哋冇拍拖。（有報道指嘉穎避開你？）我哋好friend，點解要避我！」

文：影視組