近年的港姐負面新聞多多，今屆更被指是歷屆質素最差的一屆，港姐冠軍劉倩婷、亞軍李姿敏和季軍熊穎詩異口同聲表示不認同，李姿敏說：「港姐咁多人面試，TVB揀得十個出嚟自然係精英。話我哋唔靚，只係啲人想製造話題。」
做好本分
對於師姐張舒雅「hea爆」行為，劉倩婷有所保留的說：「我返咗嚟香港唔係好耐，唔清楚件事，我諗佢有自己原因，我只可以話今年會盡我哋所能做好港姐職務，唔會令大家失望。」
劉倩婷由未當選冠軍至今是非從未停過，她直言有點無奈：「真係好多新聞，又傳我斷背、又話我結婚生仔、又傳欠債，我相信時間可以證明，以前讀女校係接觸好多中性打扮嘅朋友，我亦唔係一個貪錢嘅人。」
小心言行
熊穎詩即笑說：「我哋冇避忌，有時仲會用斷背嚟開玩笑，擺Pose時叫佢唔好掂我。」劉倩婷大方說：「知大家講笑，唔會太認真。」而李姿敏亦曾被揭與朋友在派對攬仔，她直言擔心再有爆料者，她說：「其實啲相唔算好激、好親密，有一刻都擔心陸續有嚟，其實平時都知自己做緊乜，依家肩負港姐名銜，言行會更加小心。」
文：專案組
攝：馬永堅
服裝：Miss Sixty
場地：i Thai（加寧街）
髮型：HAIR @ Lee Theatre