俗語話「三個女人一個墟」，這次陳潔靈、肥媽及葉麗儀三個公認唱得的女人聚頭，除了唱還講個不停，一邊歎茶一邊談世事百態，嬉笑間道出人生真理。
近日兩大電視台掀起歌唱比賽熱，人人都可以做歌星，分別為兩台擔任評判的Miss Chan Chan陳潔靈及肥媽，本月將放下「老師」身份與葉麗儀再度登上紅館舞台，舉行一連兩場的《三個女人一個墟》演唱會。
年輕人思想開放
Miss Chan Chan透露上次三人合作已是2006年，這次她們別開生面結合棟篤笑及演唱會形式：「我哋三個都會有唔同嘅對唱方式，總之你哋估都估唔到嘅，仲會唱顧嘉煇嘅歌向佢致敬。」肥媽早前已預告將在演唱會上為港女平反，她自爆回想初戀時竟落淚：「我都唔知點解，可能係太耐我諗唔起所以先喊，哈哈！」
身旁的葉麗儀說：「人人都有初戀，不過我咁古板所以初戀都保守啲。」Miss Chan Chan贊成保守有保守的好，直言現時年輕人對戀愛態度開放，大表認同的肥媽即謂：「我哋嗰時真係唔係咁，阿媽成日叫我哋唔好亂畀人掂，就算好想都扮唔想，唔似依家啲後生仔好快就上咗張床度！」
要學懂活在當下
這三個女人雖然各有各風格，但都擁有樂天性格，葉麗儀謂：「開心又咁過唔開心又咁過，點解唔開心啲過？」Miss Chan Chan憶述在好友黃霑的追思會上，學懂活在當下的道理，她說：「唔開心係因為太追求永恒 ，其實最緊要係享受過程。」三人即時唱出「知否世事常變，變幻才是永恒」然後又傳來陣陣洪亮開朗的嬉笑聲。
文：音樂組
攝：馬永堅
化妝：MakeUp Forever
場地：Maria's Studios Company Limited