楊秀惠在新劇《廉政行動2009》與林保怡首度合作，面對這位視帝級演員，簡直是演技越級挑戰。今次跟保怡合作後，楊秀惠坦言獲益良多，感覺開竅。
楊秀惠在多套劇集中都是飾演反派，在新劇《廉政行動2009》楊秀惠繼續走這條路線，飾演林保怡的情婦。今次雖然是扮演情婦，但較以往不同，楊秀惠不是靠風情萬種俘虜林保怡，而是靠「食腦」，令情人甩也甩不掉她。
事前大壓力
楊秀惠表示向來都非常欣賞林保怡的演技，第一次合作更是令她戰戰兢兢，她說：「保怡係一線演員，佢嘅演技大家有目共睹。我演技未去到佢嘅級數，同埋戲裏面大部分係文戲，接到劇本都好擔心，諗住如果對手戲做得唔好，除咗畀佢嘅戲蓋過，仲會做唔到導演預期嘅效果，所以事前都好大壓力。」
到正式「埋牙」拍攝卻是另一回事，楊秀惠說：「保怡平時雖然好cool，但其實佢係好nice好肯幫助人，好有前輩嘅風範，最重要係畀到對手信心，戲裏面有啲好長嘅對白，佢會事先同我講，NG係唔緊要嘅，最重要係試到最好嘅效果，有佢嘅鼓勵因而有咗信心，拍攝反而好順暢，好少NG。」
自己去嘗試
楊秀惠亦十分欣賞保怡不會擺出前輩架子說教，她謂：「佢教人嘅方法唔會好說教，佢會用啟發嘅方法嚟教你，好似講對白，保怡話每句對白係需要配合感情講出嚟嘅，唔係話背咗出嚟就得，佢講咗個方法，然後就畀你自己去嘗試。」
採訪：影視組
攝影：馬永堅
場地：馬哥孛羅香港酒店（Cucina）
服裝：TED BAKER