向來開口嗑着脷的趙碩之（Wylie），因衰多口遭雪藏後立志洗心革面，誓要待人處事都做到面面俱圓。中秋節將至，Wylie希望曾與自己傳不和的師妹尹晞（Yumi）亦能盡快解凍，全公司人月兩團圓。
為了預祝中秋節，Wylie特意換上性感兔女郎裝束迎佳節。直言最愛中秋節的Wylie，感慨地表示今年中秋對她意義特別重大：「之前我因為有嘢做得唔好，令公司唔開心，好彩最後佢哋都原諒我，我仲買冰皮月餅預祝佢哋中秋節快樂添！依家同公司關係好番，感覺上好有團圓嘅感覺，所以今年嘅中秋節對我零舍有意義。」
整爛家姐燈籠
Wylie成功走出雪櫃，但Yumi仍未解凍，令Wylie有點遺憾。她說：「我希望佢都可以盡快出番嚟，大家不計前嫌並肩作戰，咁樣先係真正嘅人月兩團圓！佢出番嚟嘅話我一定會盡全力幫佢同照顧佢，唔會再畀人話我哋不和。」
身為師姐的Wylie實牙實齒話會照顧師妹，不過童心未泯的她一見懷舊兔仔燈籠即玩個不亦樂乎，像個大細路般。問Wylie為何對兔仔燈籠情有獨鍾時，她竟自爆童年時的小器往事：「我以前有個兔仔燈籠，有一日發現佢穿咗個窿，因為覺得係家姐整爛嘅，就特登喺佢個燈籠度拮番個窿。之後發覺錯怪好人，但我哋兩個嘅寶貝燈籠都爛晒！」難怪她對兔仔有一定的情意結。
愛食雙黃月餅
雖然Wylie擁有34D、25及35的完美曲線，但私底下的她其實是大食怪一名，拍照當日見到月餅時更口水直流。Wylie邊大啖食月餅邊開心笑謂：「嘩！個月餅雙黃㗎！好好味！我鍾意食蛋黃多過食蓮蓉，我唔怕肥㗎，一次過可以食好多隻。」認真恨死隔籬！
文：專案組
攝：黎志輝
場地：Privacy@銅鑼灣
服裝：Blossoms