側田和曹格自街頭武鬥後形象大損，但前晚如常擔任音樂會演出嘉賓，側田藉歌曲暗示自己「命硬」，又高唱《B.O.K》以「I'II Be Ok」答謝慰問過他的人，不過譚詠麟（阿倫）則妙論側田頂「神奇帽」是以頭髮織成的頭髮帽，阿倫騎騎笑表示：「佢用邊隻膠水？」
「新城18巨星匯聚慈善音樂會」前晚假亞洲博覽館舉行，出席歌手包括譚詠麟、古巨基、泳兒、側田、劉美君、梁漢文、Mr.及Swing等。
早前與曹格在街頭武鬥，更慘食「撩陰腿」的側田，事件後雖然形象大損，但仍工作不絕，繼早前擔任林敏驄演唱會表演嘉賓後，前晚又出席新城騷；事先張揚不接受訪問的側田於中段出場，頭戴灰冷帽的他先獻唱一曲《命硬》，似是「憑歌寄意」自己打不死，然後向台下觀眾表示：「嘩，好high呀，趁呢個機會多謝今個星期打過電話同SMS過我嘅朋友，多謝你哋支持，送一首歌畀大家，I'II Be Ok《B.O.K》！」期間側田還走到台邊向歌迷揮手，十分風騷。
想睇佢過海關？
壓軸出場的阿倫被問到有否以校長身份訓示側田？他即妙語連珠：「問佢仲有冇得剩？定問佢頂帽係咪用頭髮做呀？不如問佢用邊隻膠水……係咪最想睇佢過海關？」阿倫解釋早前看報道有位南亞裔人士以頭髮織成帽子，他笑言側田可效法對方。
不過阿倫事後一臉嚴肅表示：「大家唔好再講喇，我見曹格喺記者會上眼神好不安，個樣好內疚同有歉意，大家應該畀機會佢哋！」
憤慨家駒被詆毀
另外，古巨基透露曾致電側田，對方告訴他沒受傷及不用擔心，基仔被問到會否叫側田織髮時表示：「人哋咁慘唔好問呢啲！（你唔幫佢？）唔好再圍繞呢樣嘢講！」基仔亦透露從網上看到有網友以「狗」字眼詆毀Beyond已故主音黃家駒，自言十分憤怒的基仔大罵：「大家要聲討呢個人，一齊鬧爆佢，要佢道歉！」
此外，曹格早前與小師妹楊青倩拍攝合唱新歌《月兒又彎彎》，對於曹格的打架事件，楊青倩表示相信師兄是個勇於認錯及願意負責任的男人。
採訪：音樂組