廿四歲的周秀娜憑32D身材橫行o靚模界，雖然靠噴血寫真集和人形攬枕成功出位，但就被衞道之士鞭撻敗壞社會風氣。而科大理學院前日宣布邀請周秀娜出席下周三舉行的「知識無限」系列講座，主題是「解讀周秀娜現象」，結果引來全城狂插。

知識宜改姿色

昨早查小欣在《巴巴閉邊個夠我查篤撐》節目中開咪炮轟她說：「科大搵周秀娜講成功之道，幾膚淺、咁低落！出攬枕、刷牙滴泡泡落胸呢啲唔係叫成功，係叫出位，科大學生唔使勤力讀書啦，靠賣樣賣身材，可以退學嘞，如果我係科大學生，焗住跟o靚模學習，呢間唔係叫科技大學，係化學大學，好化學。」

她認為「知識無限」講座都要改名叫「姿色」才對：「世上咁多知識，點解研究o靚模？夾硬將學術娛樂化，係咪博宣傳、搞噱頭、培養宅男去裝女仔呢度嗰度？前校長啱啱退休，就搞到咁冇品味。」

查小欣謂科大之後還會請議員、學者、前高官出席講座，她諷刺說：「將佢哋㩒到身份地位知識同周秀娜同grade，放長雙眼睇佢哋仲做唔做，上天保佑其他學校唔好有樣學樣。」

傷害大學品味

而模特兒莊思敏昨日出席「中國經典人物兒童訓練大賽」，對大學請周秀娜出席講座也大表愕然：「吓！好奇怪，冇理由自己講自己，應該由人哋去講，等於解構外星人，冇理由叫外星人講。（搵邊個講至啱？）傳媒代表同市民，佢哋共同營造o靚模文化。」對於科大學生亦不滿學校做法，莊思敏說：「學生應該有一定知識水平，冇咁易畀人游說。」

教育界立法會議員張文光也質疑搵o靚模做講座嘉賓，究竟可以講到多少學術東西？他促請大學在挑選嘉賓時要三思，他說：「絕對唔能夠抱住無厘頭、湊熱鬧嘅諗法，避免參與學生醉翁之意不在酒，只係湊熱鬧睇o靚模，否則會影響同傷害大學及大學生嘅品味。」

籲聽完先至講

對於飽受反對聲音圍剿，周秀娜的經理人Roy接受本報訪問時表示：「題目唔係我哋起，我哋係獲邀請出席，大家唔好咁主觀。（畀人話冇品味、膚淺？）no comment，希望大家聽完講座至發表意見。」

而科大理學院副院長吳大琪否認請周秀娜出席講座是為博宣傳：「唔可以話低俗就唔舉行，我哋亦有請前官員、商界人士出席其他講座。」他指院方希望透過講座活動，令大學生對社會現象有認識，再加入自己的分析和意見，作出思考。

採訪：音樂組