每次拍拖都會投放十足感情的名模Ana R.，當一段感情變咗質，佢都傷心欲絕，終日以淚洗臉，好似世界末日咁，食又食唔到，瞓又瞓得唔好，幾乎瘦到變人乾。幸好有幾位好姊妹輪流開解，好快令心靈受創嘅Ana走出陰霾，而情傷已愈嘅Ana，最近就與有「翻版蓋特納」之稱嘅David打得火熱。
日前Ana與好姊妹Lisa S.撇甩另一半，相約到中環ifc行街。無論兩位高妹行到邊，都會惹來不少途人注目。行到攰攰哋，二人就索性搵地方坐低飲嘢，期間見佢哋細聲講、大聲笑，而日前表示將退出模界的Lisa更心情大靚，經常笑到見牙唔見眼，擘到個口鬼咁大，差啲連蛀牙都睇埋，幾時都話友情可貴呢！
