周立璟換女友仲快過換季，同舊愛Ana R.玩完後，仲同唔少公司旗下女模拍拖，真係近水樓台。早排八太就見周立璟同新歡Marietta煙韌到當街又啜又摸pat pat。鬼咩，周生揀親嘅女友都係外國人，班女模又唔識睇中文報紙，當然唔知佢有幾咁花心啦。
周立璟花心係人都知，八太仲記得當時佢同舊愛Ana拍拖時，耐唔耐就畀人踢爆佢四出偷歡，縱使Ana隻眼開隻眼閉，但最終都頂唔住呢個花心蘿蔔，寧願早日斬纜。
鍾情西模
不過周立璟同Ana分手後，仲更加無王管，見佢換女友仲快過換季，仲差唔多個個女友都係佢公司旗下嘅女模，可能班女模又唔識中文又唔睇娛樂新聞，根本就唔知周立璟過往嘅偷歡戰績，唔怪得周生拍完一個又一個啦。不過八太都唔抹殺周生天生異稟，咁受西模歡迎，好似最近佢又同公司嘅混血女模Marietta撻着，兩個拍拖冇耐仲同居添，Marietta前排行騷時仲大讚男友係個「Nice Guy」喎。
煙韌摸股
早幾日八太就見周立璟一個人喺灣仔一幢大廈嘅大堂講電話，見佢個樣鬼咁冧，以為佢同新歡Marietta談緊情啦，點知唔夠五分鐘，Marietta就現身，周立璟見女友嚟緊即刻拿拿聲收線，之後仲交足戲，擺出一副若無其事嘅表情，跟住仲突然笑到四萬咁口，谷起胸肌又抽抽褲頭嚟氹伊人，冧到暈陀陀嘅Marietta二話不說送上香吻，兩個鬼咁煙韌啜到飽後，先行出門口等車，點知等車時周生又出招，一手輕撫女友玉背，掃下掃下仲掃埋落pat pat，真係曳曳。
文：追蹤組