郭富城昨日披上晨曦明星邀請隊八號球衣，在灣仔修頓球場參與慈善足球賽，擁有瀟灑腳法的城城，在灣仔一班老街坊前上演入球騷，憑着六個入球，成為賽事中的入球王者，表現搶鏡。
郭富城、苗僑偉、洪天明、鄭丹瑞等，昨日出席「8．8台灣水災籌款義賽」，共襄善舉。其中城城更由下午二時踢到六時，除間中稍事休息外，狀態大勇的他，幾乎都是全場奔跑，加上他控球技術超卓，不時一個扭幾個，功架十足，令觀眾席上經常傳出歡呼聲。
為慈善零舍搏命
城城賽後更謙虛地將功勞歸功予一班隊友：「賽車可以自己控制，踢波就講究同隊友配合。（你入六球好厲害！）都係多得隊友鋪橋搭路。我有操開體能，今日係為慈善出力，所以零舍搏命。其實我係灣仔舊街坊，我阿爸以前喺皇后大道東有間『大盛金舖』，我成日跟阿爸去飲茶，但就冇踏足過修頓，今日係第一次。」
家族金舖證歷史
城城談到其父昔日的金舖時說：「阿爸十幾年前過身，間金舖就由阿叔打理，三年前被政府收番，列作法定古蹟，我哋家族可以話見證咗香港歷史。（政府知唔知間舖同你有咁深淵源？）唔知，報道出咗街，唔知佢哋會唔會有咩跟進呢？（會否重遊舊地緬懷一下？）等政府整好先，我會去望望。」
文：影視組