張嘉兒當選港姐時，曾被指為「豬扒港姐」而感到不開心，心想何時才會被大家接受。最近她又頻傳緋聞，不過，嘉兒坦言喜歡講「肉麻」說話的男士。
張嘉兒最近緋聞多多，林敏驄、金剛，甚至老外都有，對此，嘉兒一一作解釋：「同林敏驄真係無喇喇嘅！除咗喺TVB見過，之後大家都冇見到，緋聞傳出時我喺大陸拍劇，都好突然。至於金剛，因為大家係朋友，事實上有約食飯，不過依家可免則免，因為對方有女朋友，免得誤會。」
唔開心叫豬扒港姐
提到外籍男友，問嘉兒是否喜歡與老外交往，她說：「冇所謂，不過我嘅朋友多數都喺外國返嚟，而且我鍾意男仔講嘢有少少肉麻，乜都講得出，我鍾意聽啲氹我嘅說話，當然要真心啦！」
之前，嘉兒經常被一些傳媒指是「豬扒港姐」，對於這些報道，她不諱言曾因此而懊惱及不開心，嘉兒說：「自己一直進取、增值，同人又相處得好好，點解會畀人咁樣針對，心諗幾時大家先會接受我，自己又唔係含住金鎖匙出世，都係不斷付出努力，當然想貪心少少攞番啲嘢！」
善意批評重拾信心
不過，現在她亦收到不少善意的評價，拾回不少信心。她謂：「都有啲滿足感，有人讚我靚咗、瘦咗，呢啲都係我努力得番嚟嘅！」問她曾否心灰意冷而想退出，她坦言：「冇喎，可以做出成績已經好開心，其實我都諗過開補習社，專門講營養、健康講座，當然依家最想喺工作上有啲成就。」
文：影視組
攝影：馬永堅
場地：天與地（諾士佛臺）