近年無綫受歡迎的綜藝節目，大多加了點點「色」，普遍取得成功，可是蕭潮順的作品卻不落俗套，即使做煮食節目，寧鬧人也堅決不落「鹽」。
蕭潮順除了是《蘇GOOD》的製作人外，也是早年受歡迎節目《運財智叻星》及《江山如此多FUN》的監製。對於近年受歡迎的《獎門人》、《美女廚房》系列，總灑了點點鹽花，他笑言：「各有各做啦，依家節目中我比較喜歡《係咪小兒科》。」
阿蘇先聲奪人
蕭潮順的喜好反映他忠於原則，他年前搞製作公司時就請來綜藝界前輩孫郁標做顧問，合力「研發」出成功「方程式」FPI2，即Family（合家歡）/Fun（趣味性）加Potential（有潛質）/Positive（正面）再加Inspiration（啟發性）及Information（資訊性）。
談到合作過的藝人，隨和的蕭潮順每次總受委屈：「第一次接觸阿蘇喺張國榮喪禮，佢做司儀我做監製，出殯當日朝早打畀佢問嘢，佢一開口就鬧，真係頂住道氣。」後來蕭潮順「聽中」阿蘇電台的煮食節目，欲邀合作出DVD，結果阿蘇簽了有線未能合作，四年後在張學友演唱會上，蕭潮順再遇上約滿了的阿蘇，二人一拍即合，蕭潮順也見識了阿蘇的辣：「第一日開工阿蘇要糖，冇工作人員聽到，佢即刻大嗌，到一星期後，阿蘇一出聲要糖，即刻有五盅糖攞埋去。」
阿叻紅得有理
多年前剛升職監製《運財智叻星》，蕭潮順同樣先被陳百祥「兇」：「第一日見阿叻，佢就同我講『仔你好彩，有機會同全港最受歡迎主持人做嘢。』嘩，未做已經『吹』到咁大，但佢做嘢好認真，知道每集嘉賓邊個夾邊個會有火花，呢輩藝人紅係有原因。」
文：影視組