胡琳（Bianca）早前擔任無綫《超級巨聲》嘉賓，跟參賽者鄧小巧合唱，她大讚對方有把靚聲：「佢為咗唱歌唔怕辛苦，每個禮拜都中、港兩邊飛，我入行咁多年，都係多得屋企人支持，先可以堅持到依家。」最近Bianca為林敏驄演唱會積極練歌，將演繹葉蒨文的《迷惑》，她記得當年這首歌的MV是葉蒨文與鄭浩南拍：「嗰時鄭浩南勁有陽光味，好鬼man，真係畀佢冧暈，我大個之後都想搵個陽光男孩做結婚對象。」可惜她太忙，冇時間識男仔，她說：「可能緣分未到啦，我仲等得嘅！」