William昨日在ZAZA酒吧舉行的「09秋冬新品發表會S-in the CITY」時裝騷，身穿Deep V豹紋裝的他帶領一班性感內衣女模行騷，謝幕時六位女模向他送上香吻，右邊面頰留下唇印，William說：「事前都知啲模特兒會錫我，但係唔知六個一齊『哄』埋嚟，嗰下都驚一驚。（有冇模特兒？）冇，我喺台上光明正大睇。（驚唔驚頂唔住？）我驚佢哋頂唔順咋！」問他是否平日見慣模特兒兼緋聞女友Angelababy？他笑說：「我屋企冇內衣模特兒喎。」

着開襠褲變怕醜仔

William於新片《死神傻了》中以芭蕾舞導師身份出現，被要求穿上超級「現代」褲教小朋友，他說：「好尷尬，小朋友對住我仲尷尬，雖然勁先有嘢睇，但為免套戲變咗三級，導演畀我坐喺度教，其實條褲好窄，服裝阿姐幫我喺後面剪咗個窿，原本我怕醜，同阿姐講不如我自己嚟，點知阿姐話：『我有咩未見過呀，細佬！』」

拍攝此片最令William難忘的是一場打交戲，由他箍實C君讓周柏豪爆樽，未料個樽爆在他的手上，雖然是糖膠玻璃樽，成手插晒糖膠要逐片鉗出玻璃及噴止血劑，幸而這個鏡頭毋須NG。

曾狂瞄趙碩之個胸

戲中William會和趙碩之大演對手戲，面對身材夠勁的趙碩之不會心猿意馬，因之前已合作過，上一套戲還要眼甘甘咁望住趙碩之個胸，他說：「我覺得佢好男仔頭，大家似兄弟囉。」

文：影視組