楊秀惠昨日接受記者電話訪問時，坦承事發當晚曾與曹格、側田見面，她說：「嗰晚我大約十一點幾落去酒吧，我同曹格係喺馬來西亞一個工作場合識嘅，平時見到面都有傾偈，大家係馬來西亞人比較friend啲，嗰晚曹格經理人打畀我，所以我落去坐咗一陣。（傾咩？）冇呀！去到佢哋夾緊band，玩得幾開心，我就同自己啲friend傾偈，曹格都有同我say hello。」

馬國同鄉好鬼friend

秀惠強調視曹格與側田為好朋友，她說：「我同側田都識。（有冇同側田傾偈？）冇乜講嘢，因為佢夾緊band，側田打鼓，曹格唱歌，玩得好開心，我大概十二點幾就走，臨走嗰陣曹格仲好清醒咁同我講：『我今次返嚟好忙，遲啲返香港，到時再玩過。』我都唔知佢哋打交，係睇報紙先知。（好驚訝？）我唔評論，佢兩個都係我好朋友，希望佢哋冇事。（知唔知佢哋為乜事打交？）我諗佢哋飲醉咗啫。」

本報拍得事發當晚身穿tube top的楊秀惠與曹格一同現身，兩人還十分好傾。	放大圖片	曹格、側田街頭講手，雙方興合合。

肥媽遲啲走或撳得住

事發當晚另一位在場的藝人肥媽則說：「嗰晚我應邀落去jam歌，同老公一齊去嘅，去到見側田同曹格一個彈琴，一個唱歌，玩得幾開心，我凌晨十二點十五分走，臨走前見佢兩個都有醉意，但仍然巴打（brother）前巴打後。（佢哋飲咩酒？）唔知，但細細杯，唔知係咪tequila，我走嗰陣佢兩個冇鬧交，我都係打開報紙先知發生咁大件事，早知我就唔咁早走，撳住佢兩兄弟唔好打，佢兩個都好小朋友，其實好好感情。」

文：影視組