港姐冠軍譚小環兩年前下嫁保險界才俊蔡強榮（Eric），「9‧11」正正是兩人結婚周年紀念日，小環認為兩夫婦要落力花心思去維繫感情，才能令大家仍處於拍拖的甜蜜感覺中。
小環在老公的辦公室內接受訪問，房內每個角落都有兩夫妻的恩愛合照，連飲水的杯都不例外，甜蜜感覺滿瀉，小環承認結婚兩年，兩人相處始終要諗吓計仔，花多點心思去經營這段夫婦關係，才不會覺得悶。
今日結婚兩周年
小環最欣賞老公百忙中都會為她製造浪漫，他倆相識於２月14日情人節，Eric要求每月14日都影一張合照來記錄這段感情，小環每次出埠工作，不忘搜集Eric最愛的啤酒杯，剛剛就由比利時的酒吧空運幾隻返港氹對方，她說：「今晚係結婚紀念日，希望有時間坐低食餐飯，拎啲珍藏杯出嚟歎吓啤酒，開心吓，其實26日啤酒節有個倒啤酒大賽，到時叫埋老公去湊熱鬧。」
最佳禮物：戒煙
由於老公工作繁重，近三個月兩人都沒有撐過枱腳，除了小環生日的那一天：「本來諗住去泰國，不過佢太忙喇，最後兩個人靜靜地食個西餐，今年收到最有意義嘅一份生日禮物，就係佢肯嘗試去戒煙。（生ＢＢ？）我老公好鍾意小朋友，但我覺得生ＢＢ要好有責任感同計劃，我自己仲係小朋友，暫時未諗呢個問題，遲一、兩年先諗啦！」
文：音樂組