周麗淇（Niki）為慶祝她主持的電視旅遊節目收視及口碑佳，前晚特別自掏腰包，花五位數筵開三席，宴請無綫和日本製作人員，Niki更希望無綫添食，安排她到埃及、南極及北極等地方拍特輯，她說：「我未試過一個人揹住背囊去遊歷！（搵個美男相伴？）千祈唔好，我唔覺得孤獨，一個人都可以拍得好開心！」
約會日本人
Niki自爆曾與日本某電台高層的兒子見面，她說：「佢三十幾歲，幾好人㗎！（發展成情侶？）唔好喇，溝通唔到！」
談到中秋節，Niki透露會跟家人一同賞月，問她是否希望中秋前找個男友人月兩團圓？Niki說：「我希望33歲前結婚生仔，因為呢個歲數生BB，復原快啲，BB又精靈啲，同埋我都好想好似Kelly（陳慧琳）咁，做一個潮媽！」至於友人可有帶她相睇？Niki則說：「冇喎，我又唔係好恨嫁，隨緣啦，我驚我去到嚇走晒啲人咋！」
或秘密結婚
另外，Niki揚言個人較傳統，不會奉子成婚，但不排除會秘密結婚，她說：「因為我驚拍拖嘅時候會太大壓力，始終呢啲係私人事，或者到生仔先同大家講！」
文：音樂組