藝人對家居裝飾的喜好，可反映出藝人本身的性格，向來喜歡簡約生活的陳霽平，其香閨的裝飾布置以柔和、簡單舒服為主，主色是白、黃色，予人閒適feel；喜歡看電影的她在客廳設有投射式螢幕：「用投射式螢幕睇電影，氣氛好好，有時約埋幾個朋友，整啲簡單小食，邊睇戲邊食嘢，係個非常好嘅節目。」
客廳掛有一幅音樂人海報以及她在澳洲生活時用過的車牌，兩樣東西「撞」出一種特別味道，陳霽平說：「我經常到世界各地做嘢，會喺唔同地方搜羅特色嘅物品返嚟做擺設，衣帽間同洗手間都放咗我搜集到嘅香薰座同石頭，我最鍾意泰國買番嚟嘅香薰座，平時點吓香薰好relax，呢個香薰座好靚，所以放喺衣帽間，擺咗年幾都唔捨得用。」
