祖兒最近忙於為新國語碟《很忙》到大陸宣傳，憑住實力及歌藝在內地的人氣不斷急升。據知北京將於本月29日及10月1日舉行建國六十周年晚會，邀請中港多位著名紅星出席，祖兒再次獲欽點與成龍齊齊代表香港參與29日晚上的演出，本報致電祖兒求證時，她說：「真係好開心收到呢個邀請，可以同成龍大哥代表香港參與今次盛會，覺得好榮幸，同埋大會又賞識我首新歌《祖國兒女》，所以到時我一定會同孫悅畀心機唱好呢首歌。」

「邊個夠膽埋身」

為隆重其事，祖兒特別跟設計師商量戰衣，希望以最靚最高貴的形象演出，老闆楊受成更安排旗下的英皇珠寶贊助過百萬元珠寶首飾，問祖兒會否擔心安全問題？她說：「唔擔心，公司會安排保安運送，何況有成龍大哥喺度，邊個夠膽埋身？」

霆鋒英皇仍有約

師兄謝霆鋒則獲邀出席10月1日國慶慶祝活動在北京天安門獻唱，可見地位舉足輕重，對於近日有傳霆鋒將約滿英皇而自立門戶，英皇唱片及藝人管理部總監霍汶希澄清說：「根本冇咁嘅事，霆鋒同英皇仲有幾年約，但係啲報道一而再、再而三咁傳，真係忍無可忍，如果呢種報道真係影響到公司收入，我哋一定會保留追究權利。」

文：音樂組