本報早於去年獨家率先踢爆黎明（Leon）已跟樂基兒（Gaile）結婚，惟兩人一直矢口否認，至最近終於紙包不住火，兩人已婚一事證據確鑿，黎明嫂Gaile亦親口承認婚訊。可是，已做了老襯的Leon至今依然不肯正面回應已婚。

前晚Leon出席Piaget Polo FortyFive & Limelight Twice Party，是他自婚訊通天後首次在公開場合亮相。面對現場不少記者向他說「恭喜晒」的Leon，先後以五次多謝來避開結婚話題，還自嘲講多過三次就係虛偽，結果他講了共五次，被現場記者取笑有兩個虛偽。

記：記者 黎：黎明

黎：（面帶笑容）今日應大會要求講咗大會嘅嘢先。

記：會唔會揀隻錶畀Gaile？

黎：錶同人物係兩回事，今日講番錶。

記：會唔會送隻畀老婆？

黎：我都話淨係講番隻錶，多謝晒咁多位。

記：會唔會補擺喜酒？

黎：私人嘢我不嬲唔講。

記：咁講人哋嘅嘢喇？

黎：人哋嘅嘢更加唔會講。

聞大話天王推咪

記：你對大話天王點睇？

黎：你問番你自己啦。（本來一直面露笑容的Leon聽罷此問題後即時收起笑容，並用手掩着錄音咪且把咪推向記者，之後又再帶笑說。）熟我嘅記者都知私人嘢我不嬲唔講。（邊說邊用手指向現場兩位跟他相熟的記者。）

記：但係Gaile都講咗，你係咪都應該交代吓？

黎：黎明不嬲都唔講自己嘅事。

記：點解唔肯講？

黎：唔係唔肯講、唔交代，係要接受我嘅性格，地球有咁多唔同嘅人，每個人都有唔同嘅生存方法，呢個就係我。多謝大家。

記：係咪你叫Gaile唔好答？

黎：多謝大家，我已經講咗三次多謝，再講就好虛偽。（依然保持笑容，說罷便轉身步入派對會場為派對揭開序幕。）

不嬲唔講私人事

到了近十一時，Leon再次從派對會場步出並接受電子傳媒的訪問，並同樣保持笑容。

黎：我相信每個傳媒都好專業，有唔同嘅新聞報道，作為一個藝人我都好專業，相信出席呢個錶展大家都會報道。今日我出嚟係同傳媒見面Say個Hi。

記：網上面公開咗你嘅私人事，你有咩意見？

黎：我唔講私人嘢，好開心，多謝晒。

記：Gaile之前話覺得好shock。

黎：多謝晒。（笑着向記者揮手並在工作人員護送下登車離開。）

採訪：名人組、專案組