【林淑汶北京直擊】自從練武手部受傷後，偉仔一直在家養傷，昨日他現身北京出席卡地亞珍寶藝術展，透露左手表面傷勢已痊愈，但醫生指仍有水腫，而在家練功時甚至不能發力，他說：「一出力就好痛，試過將隻手包厚啲，點知拍戲時穿崩，所以要停止拍攝，真係唔好意思，阻住部戲嘅進度，但冇辦法，都驚唔知幾時好得番，其實依家手骨唔痛，係肌肉撕裂，休息咗幾個星期，再做番運動，但係一跑步郁到隻手又好痛，唔做運動又唔得，好驚之前嘅練習會白白浪費，惟有忍痛都繼續練習。」
疑似「中國FBI」
但喜愛藝術的他，昨日仍忍着手痛，也要出席故宮博物館欣賞卡地亞的瑰寶，他說：「有時我都會去拍賣行睇拍賣品，好多年前試過喺拍賣行買咗一座皇室佛像雕塑，原本好開心，但過咗兩日，有個好似『中國FBI』嘅人搵我，話呢座雕塑係中國文物要收番，仲記低我嘅名及資料，我用錢買，唔明點解當我好似賊咁，好荒謬。（佢哋事後有冇畀番錢？）有，但好耐之後先畀。」昨日偉仔佩戴Tank手錶及Trinity戒指，是他十年前買下的，而他的結婚戒指也是該品牌的出品，他表示是太太嘉玲揀選的，又認為珠寶對於男人最有意義的地方，是方便送禮，看來嘉玲應該收過不少珠寶了。
葉明子下周出嫁
近日多位藝人包括劉德華、黎明和楊千嬅被踢爆婚訊，當年同屬五虎的偉仔，聞華仔被封大話天王，亦出口撐對方：「人冇完美，每個人有兩面，相信fans唔係小朋友，會明白偶像最後都要結婚有家庭。」而一直希望與嘉玲生BB的他，指生小朋友一切隨緣。
昨日假故宮舉行卡地亞珍寶展，現場人山人海，500名嘉賓應邀出席，除了梁朝偉，還有池珍熙、郭晶晶和葉劍英的孫女葉明子等，各人一起行紅地氈，現場還有人打鼓及搖旗，聲勢浩大。現為時裝設計師的葉明子更報上喜訊，表示下星期將與美國籍男友Jonathan結婚，她說：「男友做銀行，婚禮在北京及美國都會舉行，婚紗由我設計。」
文：名人組