華仔被踢爆跟朱麗倩的婚訊後，多年來建立的形象毀於一旦，可謂「千年道行一朝喪」，同樣是五虎的梁朝偉就剛剛相反，大方公開跟劉嘉玲多年來的戀情，直至兩人結婚都一樣「攞正牌」公告天下，嘉玲昨日在活動上恭喜幾對已婚藝人，對於華仔被稱「大話天王」，她說：「呢個世界好多紛擾，網絡又好發達，好多嘢真真假假好難定論，希望大家保持好嘅心態去睇，佢背後有好多無奈同壓力，美麗的謊言可以接受。」對於她跟偉仔一直都公開關係，嘉玲笑言：「我自己好坦然，可能係自己個性格，都幾慶幸偉仔唔係偶像派，真係好好彩！」

阿倫：點解咁辛苦？

校長譚詠麟（阿倫）亦以過來人身份勸華仔要學會釋懷，阿倫說：「今次係一件好私人嘅嘢，唔明佢點解咁辛苦，（偶像派辛苦啲？）某尺度上唔想講就唔講，唔使理一部分人點講，關乎屋企人嘅嘢，只答多謝關心，亦唔使黑面，雖然佢冇（黑面）。」問到是否覺得華仔要再次公開交代，阿倫說：「阿彌陀佛，大家都咁辛苦！」問他會否指引華仔？阿倫認為華仔處理事件跟性格有關，因他不想被人牽住走。

華仔一臉憔悴、雙眼浮腫，出入有助手護駕。	阿倫勸華仔要學會釋懷。	華仔乘坐保母車（右）出發，一輛平時用作接載朱麗倩的座駕（左）則攔截採訪車。

一臉憔悴雙眼浮腫

另外，昨午華仔身穿白色恤衫、牛仔褲如常返工，負面新聞纏身的他一臉憔悴、雙眼浮腫，乘坐保母車出發到觀塘公司，期間一架平時接載朱麗倩的座駕用來攔截採訪車，混亂間，該車跟其中一架採訪車發生輕微碰撞，當追問到他是否不認女？華仔一直微笑不作回應，直至下午四點半離開，記者驚見華仔褲頭其中一粒鈕未有扣好，未知是否受盡是非困擾而心神恍惚所致，而華仔雙親昨晨如常外出飲茶，未有回應記者問題。

採訪：追蹤組、名人組、音樂組