身材高挑的鄭希怡（Yumiko），閒時最愛吃零食，缽仔糕、雞蛋仔、杧果乾及炒栗子等無一不愛，她說：「有時搭長途機或長途車嗰陣，坐都坐到悶，最好有啲嘢咬吓，我最鍾意酸酸哋嘅零食，好似話梅乾或者杧果乾等，以前讀書時，外面有架專賣呢啲『口立濕』車仔，我成日排隊去買，（唔怕肥？）OK啦，其實依家鍾意食一啲養聲潤喉嘅零食，對唱歌有幫助。」
Yumiko又暢談雞蛋仔故事，她說：「雞蛋仔係我細個最鍾意食嘅一款小食，同嫲嫲出街時，一定會叫佢買，試過有次同嫲嫲因小事嗌交，搞到好唔開心，大家冇同對方講嘢，嫲嫲之後出咗街，買咗個熱辣辣嘅雞蛋仔畀我食，嗰時先覺得親人點都係愛你同關心你，佢哋嘅愛係無私嘅，依家嫲嫲行動不便，係時候我照顧同報答佢。」